《江嵐客家文學專欄》

| | | 轉寄

台灣客人過五月節(8)

結語

  全台灣訪問起來,大家就mò企雞卵ke記憶,全部ke記憶就he對學校項傳出來ke,老底ke客家人大家就mò掛香包ke經驗,頭擺有做「香包」喊細人仔帶ke風俗,可能因爭台灣ti多擺ke殖民文化洗禮過後,為著經濟因素一時失傳,這幾年仔經濟發展,香包續(sa)變到五月節ke特色商品,市面項有十二生肖、多啦A夢、小叮噹、漫畫人物等等ke香包就當多,古早ke時節有用雄黃包香包避邪ke風俗,m̀過ngài兜ke記憶底肚,還細ke時節大家都mò掛香包ke經驗。黃運興先生he苗栗卓蘭人,佢從細有帶苿草避邪,當做護身符ke經驗。訪問到這下,全台灣ke客人底背都mò人有食雄黃酒ke經驗,聽講雄黃he砒霜,he重金屬食品,對人體有害。m̀過,拜阿公婆he全體客家人共同ke大事,聽講黃巢之亂該央時,盡多客人會揹等自家祖先ke神主牌逃難,客家人tui中國大陸遷台該央時,也he揹等祖先ke骨骸來台灣ke,早期客家地區滿奈就看得著罐罐纍纍ke「金斗甕」,寄放ti空屋爛廟或者he大眾廟項,mò就he放到蓬蒿崀頂,也he放ti大樹土坵下,做得認得出來ke所在,等安定家園ke時節正有請地理先生擇吉安葬,做風水立碑石。敬天尊祖he亻恩五千年來,道統一脈相傳,客人對祖先ke傳承lâu崇敬大家就呵腦,做得用兩句客家名言來講:「寧賣祖宗田,不忘祖宗言」或者用「祭祖如祖在,敬神如神在」,來訓示客家子弟,oi用虔誠ke心看待拜神祭祖ke儀式,傳承客人不忘本ke民族意識,幾下千年以來,逐擺he堵著生活不如意ke時節,佢就會發揮pûn人精神心靈安定平靜,使得身心安頓ke作用。香茅、榕樹葉、艾仔he客家庄奈位就看得著ke植物,大家就用就地取材ke方法準備供品,就像歇桃園ke人就用豆腐乾、核花蓮ke人就用魚仔做牲儀,環境脣邊出產麼該就用麼該葉仔包粽仔,講著thak粽仔he為著愛國詩人屈原ke典故,這種風俗he全華人地區都有ke民俗,客人ke粽仔,全部he有稜有角ke粽仔;單淨台中大安ke海陸粽he生來長長扁扁ke,客人ke粄粽全部he白色ke,mò人攞艾仔,艾粄he清明時節上墳祭祖正有用著。總下來講客人對五月節盡重視,五月節he一年肚項ke三大節日之一,大家就做到盡mò閒、盡像樣,這he客家人盡傳統ke所在。


補述:原住民ke粽仔,一律he粄粽,嚴格來講應該he揰過ke糍粑仔包ke,粽葉he野薑花葉,底肚包豬肉、蝦pî、香菇、紅蔥頭、蘿蔔乾這兜料同漢人共樣,mò共樣ke he佢兜ke粽仔,生來扁扁,四角四角,大約仔二、三口就食忒了!逐擺豐年祭原住民就會做這種扁扁ke粽仔請人食,佢兜安道a-bái。

  有一種魚粽he ngài第一擺訪問著ke,全台灣單淨綠島ke居民有包魚粽ke風俗,葉仔he月桃葉(四縣講狗薑葉),月桃葉先洗過、絲骨、煠過,包米粽,底肚包豬肉、蝦pî、香菇、蔥仔酥、蘿蔔乾、滷過ke魚肉(魚名he──破雨傘),佢兜ke粽仔he用蒸ke,綠島mò thak kî粽,也mò粄粽,佢兜ke三大節同台灣mò共樣,佢兜he過清明節、七月半、過年,五月節mò拜祖先,單浄拜神像(神明chhat仔,一張神像用框裱起來,拜觀音娘抑he關公,各人拜ke神明mò共樣。),插青ke部份有:榕樹葉、艾仔兩種,插到過年清囤正有拿下來,除忒屋下ke細人仔出水珠,正有拿下來煮水pûn細人仔洗身,有消熱解毒ke功能。這兜資料he在綠島本島訪問到綠島居民ke實際記錄。

  台中大里Holo人ke「粿粽」,he用艾仔攞糯米亼(chhi̍p) ke,雜貨店ke頭家娘阿款講攞艾仔kha顧胃,加kha香,肚項包香菇、蘿蔔乾、番豆、豆腐乾這兜炒過ke香料。

※ 以上各地ke訪問,全部保留受訪問者ke阿姆話原音:《竻瓜同吊瓜》共樣he《大黃瓜》,《月桃》he花蓮同南部腔,苗栗講《狗薑》,《划龍船同撐龍船》也he地方腔。

    2006年五月節專題演講    (編入台灣客家話文學讀本2006/9)(登ti台南市客家協會年刊2006)