《戀戀台灣客家文學》

| | | 轉寄

桐花新娘(2)

  「嚇!」秋妹對桐花樹後背衝出來嚇志風,志風mò搭佢,直接愛穿過桐花林轉去。秋妹mò想著佢會恁冷淡,煞煞揪等厥袖仔m̀肯放:「啊啊!你莫án-nè啦!」

  志風斡頭過去看佢,堵好正對著厥紅冬冬ke面頰卵,面燒起來,遽遽又lâu自家面斡開。

  秋妹看佢恁樣,恅著佢發譴:「志風哥,失禮!請你莫m̀搭ngài,好mò?佇這片,ngài就識你一儕,你mò愛睬ngài,ngài仰結煞?」

  「細妹人……án-nè揪等細徠人ke衫袖m̀好看,放手啦!」志高看m̀肯放,總就自家用另外一隻手拉開厥手,一摸著厥手,就像分麼个熝著樣仔,手又收轉去。

  秋妹像聽著麼个笑科,雙手揇肚緊笑:「哈哈!怕麼个?」

  想佢ti英國時,該片人動啊著就唚一下、揇一下,佢這下揪等厥袖仔定定,又mò做麼个。轉來台灣mò幾日,又來到這山項,大家都當保守,m̀好(hau)同佢這「外背人」講忒多話,只有志風哥對佢好,會同佢講話。

  唉!也難怪大家會恁呢!聽講對上擺街項賣私菸ke婦人家pûn銃打傷,一連串發生當多事情了後,政府決定戒嚴,大家都m̀敢凊採講話,人心惶惶,驚怕pûn警察捉去,下場m̀-he消失就he發癲。像阿爸,做生理做到英國去,認識恁多大官,警察看著佢都oi kha客氣ke人,也共樣當小心注意。為著心肝妹仔ke安全,秋妹正轉來台灣,馬上喊佢去山項「尞」幾日,等kha平靜正轉去。

  Mò奈何,大家聽著佢he范頭家ke妹仔,做得閃幾遠就幾遠,閃m̀開,就哼哼哈哈客氣幾句,講mò閒,就洩走咧!驚怕秋妹會告發麼个。

  這桐花林he村ke出入口,志風逐日khâi菜到街項賣,都會經過這片,故所逐擺秋妹都挑挑ti這片等佢。M̀過,自從志風ke爺娘lâu志風講了麼个了後,志風開始閃避佢。

  志風mò應佢,拈起一蕊蕊ke油桐花,挷一兩支草,結成油桐花冠,戴到厥頭那頂。秋妹知厥心意,緊對佢笑,害志風面紅濟炸。 「范小姐……」

  秋妹面色一變。

  志風看佢恁傷心,又遽遽改口:「秋妹……」