《戀戀台灣客家文學》

| | | 轉寄

小說:〈打扮〉(7)

「來,接下來我們檢討第三題。」Ngài 既經轉去學校上班,看等教室底肚kiâ位仔空空,試著yû-teû失望,希望m̀-he ngài害kì寒著,ya 希望kì遽遽好起來,轉來學校上課。正一禮拜mò看著kì,就緊念kì。難得ti臺中學校堵著故鄉人,yu án yû緣做得教kì三年,kì me做ngâ國文小先生oi三年le,還kha難得he kì總he親膩膩緊lâu ngài講客,yû kì做伴,日日tu-he快樂ke日仔。搬過來後,ngâ辦公室lâu kiâ教室就he隔壁鄰舍,sa mò想著,màng搬過來 ngài就先請假一禮拜,kì me共樣。Kì mo來,麼人lâu ngài用客話譫哆nò?想到liá,一時m̀記得ngài ti檢討考卷,透一口大氣。

「老師?」Kûi班學生仔目珠大大蕊看ngài,pûn ngài嚇著。

「哈哈沒事!」Ngài試著當phài-se,遽遽拗轉來:「我是想到最近的新聞,所以忍不住嘆氣……啊對,最近不是有擄童撕票案的犯人越獄嗎?被抓到還說什麼想見家人才會這麼做,也不想想自己是為什麼入獄。」

「對啊老師,我也有看到這新聞耶!」

「聽說他逃出來後,我超害怕在路上遇到他,要是我被抓去怎麼辦?我媽會哭死吧?」

「不會呀,這樣你就不用考學測了呀!」

「哈哈哈哈哈!」

岔線講到新聞,學生仔比檢討考卷還啊yû精神。

「ㄟ老師,之前不是一直在吵死刑要廢掉?老師你覺得咧?」

Liá-ha換學生仔問ngài。Ngài màng en kì,學生仔就自家吵起來。

「說什麼廢話?他殺人耶!殺人償命!老師對吧?」

「不只他該死,他們全家都該死!憑甚麼別人永遠見不到自己的女兒,他卻可以越獄說要見老婆跟女兒!」

Kûi班鬧熱煎煎,麼个看法tu yû,ngài根本mò講話ke機會,唉!Ngài想檢討考卷啊……

「老師,那個壞人不也是苗栗人嗎?跟你同鄉耶!」

「Póng!」一聲大大ke開門聲!著一下驚!所有ke人全部恬靜下來。大家看向門,kì來le,背等書包,目瞋瞋看等大家,yu看等ngài,恬恬mò講話,行過去,坐下來。Kûi班恬索索仔,mò人講話。

Kì ti then-sú ngài請大家恬靜?看kiâ目神,ngài試著當怪。考卷順序檢討好le,後來mò人講話,Kûi間教室單淨yû ngài講課聲。

「六月日頭,後ôi拳頭……」Ngài心肝頭m̀知ngióng-è想著liá句話……

下課,ngài行兼過去,想感謝kì,lâu kì講話,kì sa面逼逼仔企起來,離開教室。