《客語白話字聖經試讀版》

 | | | 轉寄

Yok-hon Fuk-yîm, Thi-15-chông_1 Yâ-sû He Chṳ̂n ke Phù-thò-su

作者 Hak-ngî Sṳn-kîn 2009.06.14

約 15:1 Ngài he chṳ̂n ke phù-thò-su, Ngâ Â-pâ he châi-chung ke ngìn.
約 15:2 Só-yû su̍k Ngài chúng-he mò kiet kó-chṳ́ ke su-kî, Kì chhiu chién-thet; ya só-yû kiet kó-chṳ́ ke, Kì chhiu siû-chién, sṳ́ kì kiet kó-chṳ́ kha tô.
約 15:3 Liá-ha yîn-vi Ngài lâu ngì-teû só kóng ke tho-lî yí-kîn sṳ́ ngì-teû chhiang-li lé.
約 15:4 Ngì-teû oi yit-chhṳ̍t sâng chhai Ngài tî-poi, Ngài ya sâng chhai ngì-teû tî-poi. Chhiong su-kî ká-sṳ́ mò lâu phù-thò-su chiap-tén, chhiu m̀-voi kiet kó-chṳ́; án-ngiòng ngì-teû, ká-sṳ́ mò yit-chhṳ̍t lâu Ngài kiet-lièn, ya m̀-voi kiet kó-chṳ́.
約 15:5 Ngài he phù-thò-su, ngì-teû he su-kî, sâng chhai Ngài tî-poi ke ngìn, yu Ngài ya sâng chhai kì tî-poi ke ngìn, liá-ke chhiu-voi kiet kó-chṳ́ tô-tô; yîn-vi ngì-teû lì-khôi Ngài, chhiu mò fap-thu cho-mak-ke .
約 15:6 Na mò sâng chhai Ngài tî-poi ke ngìn, kì chhiu pit pûn ngìn fit-thet chhai ngoi, chhiong su-kî, chhiu châu-thet, chhiu pûn ngìn thiú-lo̍k fó tî-poi seû-thet.
約 15:7 Ngì-teû ká-sṳ́ yit-chhṳ̍t sâng chhai Ngài tî-poi, Ngài-ke fa ya yit-chhṳ̍t chûn-sú, só-yû ngì-teû oi khiù mak-ke, yit-thin lâu ngì-teû cho-sàng.
約 15:8 He yîn-vi án-ngiòng Ngâ Â-pâ chang tet yùng-kông, sṳ́-tó ngì-teû kiet kó-chṳ́ tô-tô, ngì-teû ya ki-siu̍k cho Ngài-ke mùn-thù.
約 15:9 Chhiu-chhiong Â-pâ oi-siak Ngài, Ngài ya oi-siak ngì-teû; ngì-teû oi sâng chhai Ngài-ke thung-siak-chûng.
約 15:10 Ngì-teû ká-sṳ́ chûn-sú Ngài-ke min-lin, chhiu pit sâng chhai Ngài-ke thung-siak-chûng, chhiong Ngài yû chûn-sú Ngâ Â-pâ ke min-lin, ya sâng chhai Kì-ke thung-siak-chûng.
約 15:11 Ngài lâu ngì-teû kóng liá-teû fa, he-oi sṳ́ Ngài-ke hí-lo̍k pûn ngì-teû tet-tó, sṳ́ ngì-ke hí-lo̍k voi nêm-chhut-lòi.
約 15:12 Liá-ha Ngài-ke min-lin, chhiu-he ngì-teû oi pí-chhṳ́ siông-oi, chhiong Ngài oi-siak ngì-teû án-ngiòng.
約 15:13 Ngìn vi-chho̍k kì-ke phèn-yû hî-sên sâng-miang, ngìn-kiên ke oi mò pí liá kha ví-thai ke.
約 15:14 Na ngì-teû hàng Ngài só min-lin ke sṳ, ngì-teû chhiu-he Ngài-ke phèn-yû.
約 15:15 Ngài chhṳ̀-heu mò chai khon ngì-teû cho nù-phu̍k; yîn-vi nù-phu̍k m̀ tî kì-ke chú-ngìn só hàng ke sṳ; m̀-ku Ngài chiông ngì-teû khon-cho phèn-yû; yîn-vi só-yû Ngài chhiùng Ngâ Â-pâ só thâng-tó ke, Ngài yu chhiòn-phu kóng pûn ngì-teû tî.
約 15:16 M̀-he ngì-teû sién Ngài, he Ngài sién ngì-teû, Ngài yû sat-li̍p ngì-teû, sṳ́ ngì-teû hi kiet yún-chhùn ke kó-chṳ́; sṳ́-tó ngì-teû chhâi Ngài-ke miàng, fàm tui Â-pâ só khiù ke, Kì chhiu su pûn ngì-teû.
約 15:17 Ngài chiông liá-teû sṳ min-lin ngì-teû, he-oi sṳ́ ngì-teû pí-chhṳ́ siông-siak.