《客語白話字聖經試讀版》

| | | 轉寄

Má-thai Fuk-yîm thi 27 chông_07 Yâ-sû ke Sí

27:45 Tông-chu ke sṳ̀, thiên-vû thi-am, thai-yok yû sâm-tiám-chûng kiú.
27:46 Thai-yok to hâ-chu sâm-tiám-chûng, Yâ-sû chhiu thai-sâng hêm, kóng : “Yî-li, Yî-li, Lâ-mâ sat-pâ-kok-thai-nì?” Yi-sṳ chit-he kóng : “Ngài-ke Song-chú, Ngài-ke Song-chú, Ngì ngióng-pân piong-thet Ngài nò?”
27:47 Khî-chhai sùn-theù ke ngìn, yû-teû thâng-tó chhiu kóng : “Liá-ke ngìn chhai hêm Yî-li-â.”
27:48 Khì-chûng yû yit-ke-ngìn ngiàm-sṳ̀ cheú-ko-hi, nâ yit-ke hói-mièn chim sôn-chiú, yèn-heu thak chhai thèn-thiàu-táng lòi nâ pûn Kì lîm.
27:49 Khì-thâ ke ngìn kóng : “M̀-sṳ́, khon Yî-li-â yû lòi kiu Kì mò.”
27:50 Yâ-sû yu thai-hêm yit-sâng, chhiu thôn-hi sí-thet.
27:51 Khon-â! Koa chhai Sṳn-thien-tú ke pu-liàm, tui táng-kô to tái-hâ lie̍t-cho lióng-sak; Thai-thi ya chṳ́n-thung; phàn-sa̍k ya lie̍t-khôi;
27:52 ke-teû fùn-mu ya chṳ́n-khôi; chhin-tô yí-kîn ko-sṳ̂n ke sṳn-thù, ya tet fán-sâng hí lòi.
27:53 chhṳ̍t-to Yâ-sû fu̍k-fa̍t chṳ̂-heu, kì-teû chhiu lì-khôi fùn-mu, ngi̍p-hi Sṳn-sàng;pûn chhin-tô ngìn khon-tó kì-teû.
27:54 Ke chóng Yâ-sû ke kiûn-kôn lâu kì khiung-ha ke pîn-é, khon-tó thi-thûng, lâu só fat-sên ke sṳ, kì-teû chhiu thai-thai chho̍k-kiâng, kóng : “Liá-ke ngìn sṳ̍t-chhai he Song-chú ke Lai-é.”
27:55 Chhai ke-vi, yû chhin-tô fu-ngìn-kâ, yén-yén chhai ke khon, kì-teû he tui Kâ-li-li thèn-tén Yâ-sû lòi fu̍k-sṳ Kì-ke.
27:56 Khì-chûng yû Mat-thai-lâ ke Mâ-li-â, Ngâ-kok lâu Yok-sit ke â-mê Mâ-li-â, lâu Sî-pí-thai lióng-ke lai-é ke â-mê.